अमेरिका आणि इस्त्रायल यांच्या इराणवरील संयुक्त हल्ल्यानंतर संघर्ष अधिक तीव्र झाला आहे. अमेरिका व इस्त्रायलच्या कारवाईनंतर इराणने आखाती देशांतील अमेरिकेचे मित्रदेश तसेच तेथील अमेरिकन लष्करी तळांवर लक्ष्य साधल्याची माहिती आहे. ‘रॉयटर्स’ने दिलेल्या वृत्तानुसार, रात्री झालेल्या इराणी हल्ल्यांत दुबईच्या आंतरराष्ट्रीय विमानतळाचे आणि त्याच्या शेजारील ऐतिहासिक बुर्ज अल अरब हॉटेलचे नुकसान झाले आहे. तसेच बुर्ज खलिफा हॉटेलच्या परिसरालाही लक्ष्य करण्यात आल्याचे सांगितले जाते. रविवारी पहाटे अमिरातीच्या मीडिया ऑफिसने माहिती दिली की विमानतळावरील घटनेत चार जण जखमी झाले आहेत.
दुबई मीडिया ऑफिसने ‘एक्स’वरील पोस्टमध्ये म्हटले की, दुबई इंटरनॅशनल (DXB) येथील एका कॉन्कोर्सला झालेल्या घटनेत किरकोळ नुकसान झाले असून परिस्थिती लवकरच नियंत्रणात आणण्यात आली. बुर्ज अल अरब हॉटेल हे दीर्घकाळापासून अमिरातीचे सर्वात ओळखण्याजोगे प्रतीक मानले जाते. १९९९ मध्ये जुमेराह बीचवरील कृत्रिम बेटावर सुरू झालेले हे हॉटेल शहराच्या लक्झरी प्रतिमेचे जागतिक प्रतीक बनले आहे. शनिवारी, शहरातील कृत्रिमरित्या तयार केलेल्या पाम जुमेराह बेटावरील दुसऱ्या एका हॉटेलजवळही आग लागल्याची माहिती आहे.
‘रॉयटर्स’च्या वृत्तानुसार, रात्री झालेल्या हल्ल्यात दुबई आंतरराष्ट्रीय विमानतळ येथील एका टर्मिनलचे नुकसान झाले. हे विमानतळ जगातील सर्वाधिक वर्दळीच्या प्रवासी केंद्रांपैकी एक असून मध्य पूर्वेतील पर्यटन आणि व्यापारासाठी महत्त्वाचे प्रवेशद्वार आहे.
दरम्यान, अबू धाबी विमानतळ प्रशासनाने सुरुवातीला ‘एक्स’वरील पोस्टमध्ये झायेद आंतरराष्ट्रीय विमानतळावरी येथे झालेल्या घटनेत एका आशियाई नागरिकाचा मृत्यू आणि सात जण जखमी झाल्याचे म्हटले होते; मात्र नंतर ही पोस्ट हटवण्यात आली, असे ‘रॉयटर्स’ने नमूद केले आहे. दुबई मीडिया ऑफिसने हवाई अडथळ्यामुळे जेबेल अली बंदरातील एका बर्थला आग लागल्याचीही माहिती दिली.
विमान वाहतुकीच्या प्रमुख केंद्रांवर क्षेपणास्त्र हल्ले
इराणने अबू धाबी, दुबई आणि दोहा या पूर्व-पश्चिम विमान वाहतुकीच्या प्रमुख केंद्रांवर क्षेपणास्त्र हल्ले केल्याचे वृत्त आहे. त्यानंतर विमान कंपन्यांनी दुबई आणि अबू धाबीला ये-जा करणारी उड्डाणे तसेच संपूर्ण प्रदेशातील अनेक सेवा स्थगित केल्या. फ्लाइट-ट्रॅकिंग डेटानुसार, मध्य पूर्वेतील हवाई क्षेत्राचा मोठा भाग काही काळासाठी रिकामा झाल्याचे दिसून आले, असेही ‘रॉयटर्स’ने वृत्त दिले आहे.
