पाकिस्तानच्या कराची विमानतळाबाहेर रविवारी भीषण स्फोट झाला. या स्फोटात दोन चिनी कामगार ठार झाले आहेत, तर आठजण जखमी आहेत, असं वृत्त एपीने दिलं आहे. आगीच्या भक्ष्यस्थानी आलेल्या गाड्या आणि धुराचे लोट व्हिडिओतून दिसत आहेत. पोर्ट कासिम इलेक्ट्रिक पॉवर कंपनी (प्रायव्हेट) लिमिटेडच्या चिनी कर्मचाऱ्यांना घेऊन जाणाऱ्या ताफ्यावर रात्री ११ वाजण्याच्या सुमारास हल्ला झाल्याचे चीनी दूतावासाच्या निवेदनात म्हटले आहे. त्यात पाकिस्तानी जवानही मारले गेल्याचे म्हटले आहे.
डॉनच्या वृत्तानुसार, “सीआयडीचे महासंचालक आसिफ एजाज शेख म्हणाले की, स्फोटाच्या स्वरूपाबाबत सध्या काहीही स्पष्ट झालेले नाही.” स्थानिक टीव्ही स्टेशन जिओ न्यूजला प्रांतीय गृहमंत्री झिया उल हसन म्हणाले की, “हा स्फोट परदेशी लोकांना लक्ष्य करणारा हल्ला होता.” उपमहानिरीक्षक पूर्व अझफर महेसर म्हणाले की, “हे तेल टँकरचा स्फोट असल्यासारखे वाटत होते.”
चिनी निवेदनात या स्फोटाला “दहशतवादी हल्ला” असे संबोधण्यात आले आहे आणि या स्फोटाची सखोल चौकशी करण्यात यावी यासाठी ते पाकिस्तानसोबत काम करत असल्याचे म्हटले आहे. “पाकिस्तानमधील चिनी दूतावास आणि वाणिज्य दूतावास या दहशतवादी हल्ल्याचा तीव्र निषेध करतात (आणि) दोन्ही देशांतील निष्पाप बळींबद्दल तीव्र शोक व्यक्त करतात,” असे निवेदनात म्हटले आहे.
“विमानतळाची इमारत आणि मालमत्ता सुरक्षित असताना विमानतळाजवळील मॉडेल कॉलनी रस्त्यावर स्फोट झाला होता. संबंधित संस्था स्फोट/अपघाताच्या कारणांचा तपास करत असताना विमानतळ प्रशासनाने अग्निशमन दलाची वाहने तात्काळ घटनास्थळी पाठवली” ,असे नागरी उड्डयन प्राधिकरणाचे प्रवक्ते सैफुल्ला यांनी एका निवेदनात म्हटले आहे.
दरम्यान, कराचीच्या जिना आंतरराष्ट्रीय विमानतळाजवळ झालेल्या हल्ल्याची जबाबदारी पाकिस्तानी फुटीरतावादी दहशतवादी गट बीएलएने स्वीकारली आहे.