अभिनेत्री सोनाक्षी सिन्हा २३ जून रोजी लग्नबंधनात अडकणार आहे. सोनाक्षी व तिचा बॉयफ्रेंड झहीर इक्बाल दोघेही मुंबईत लग्न करणार आहेत. त्यांच्या लग्नाची पत्रिका सोशल मीडियावर चर्चेत आहेत. तसेच या दोघांना लग्नाबद्दल इंडस्ट्रीतील अनेक जण शुभेच्छा देत आहेत. अशातच सोनाक्षीचे मामा व बॉलीवूडचे प्रसिद्ध चित्रपट निर्माते पहलाज निहलानी यांनी भाचीच्या लग्नाबद्दल प्रतिक्रिया दिली आहे.
‘झूम’ला दिलेल्या मुलाखतीत पहलाज निहलानी यांनी सोनाक्षी आणि झहीरचं लग्न होणार आहे, यावर शिक्कामोर्तब केलं आहे. इतकंच नाही तर ते या दोघांच्या लग्नाला हजेरी लावणार आहेत. त्यांनी सोनाक्षी व झहीर यांना शुभेच्छा दिल्या आहेत. “मी सोनाक्षीचा मामा आहे. तिला आणि झहीरला माझे आशीर्वाद आहेत. अखेर ते लग्न करत आहेत. मी त्यांना खूप साऱ्या शुभेच्छा देतोय. मी याबद्दल शत्रुघ्न सिन्हांशी बोललो आहे आणि ते म्हटले की आपण भेटून बोलुयात. आमची लग्नाबाबत फार चर्चा होऊ शकली नाही,” असं पहलाज निहलानी म्हणाले.
सोनाक्षी व झहीर हे लग्न करणार आहेत, त्याची कल्पना होती का? असं विचारल्यावर पहलाज निहलानी म्हणाले, “आजकालची मुलं स्वतःचे निर्णय स्वतः घेतात, त्यामुळे पालकांनी मुलांच्या निर्णयात आनंदी असायला पाहिजे. महत्त्वाची बाब म्हणजे त्या जोडप्याला वैवाहिक जीवन जगावं लागतं. त्यामुळे त्यांनी एकमेकांवर प्रेम करायला पाहिजे आणि ते एकमेकांबरोबर कंफर्टेबल असायला हवे.”
“सोनाक्षी माझी एकुलती एक मुलगी आहे अन् ती माझ्या खूप जवळ आहे. जर माझ्या मुलीचे लग्न होत असेल तर मी तिच्या निर्णयाला पाठिंबा देईल. सोनाक्षीला तिचा जोडीदार निवडण्याचा अधिकार आहे आणि मी तिच्या लग्नाच्या दिवशी सर्वात आनंदी बाबा असेन,” असं शत्रुघ्न सिन्हा टाइम्स ऑफ इंडियाला दिलेल्या मुलाखतीत म्हणाले.