भारत हा फक्त एक देश किंवा राष्ट्र नाही ही एक देवभूमी आहे. ही आपली माता आहे आणि या मातेचे रक्षण करणारे आपले वीर जवान आपले बंधू, रक्षक अगदी देवदूत म्हंटल तर हरकत नाही. सर्वजण आपल्या कुटुंबासोबत दिवाळी साजरी करत असताना आपल्याला आनंदात विरजण पडू नये, कोणीही या देशाकडे आपल्या माणसांकडे वाकड्या नजरेने बघू नये, यासाठी सीमेवर कशाचीही पर्वा न करता आपले सैनिक आपले रक्षण करत असतात.. याच आपल्या भारत मातेच्या पुत्रांबरोबर आपल्या लाडक्या पंतप्रधानांनी दिवाळी साजरी केली आहे. खरतर हे काही पहिल्यांदा होत नाही. गेल्या दहा वर्षांत पंतप्रधान नरेंद्र मोदी यांनी दिवाळी साजरी करण्याला राष्ट्रीय परंपरा बनवले आहे, असे दिसून येते. मोदी यांनी प्रकाशाचा हा सण बहुतांश वेळा देशाच्या सुरक्षेची काळजी घेणाऱ्या सशस्त्र दलांबरोबर साजरा केला आहे. त्यातही त्यांनी जवानांबरोबर साजरी केलेली दिवाळी आव्हानात्मक असणाऱ्या दुर्गम सीमाप्रदेशात; तसेच मैदानी प्रदेशात आणि पर्वतीय प्रदेशात साजरी केली आहे.
या वर्षी पंतप्रधान मोदी यांनी गोवा आणि कर्नाटकातील कारवारच्या किनाऱ्यावर भारतीय बनावटीची पहिली विमानवाहू युद्धनौका आयएनएस विक्रांतवर सोमवारी दिवाळी साजरी केली. त्यामुळे दिवाळी साजरी करण्याची ही परंपरा त्यांनी नव्या उंचीवर नेली आहे. या युद्धनौकेवरून खलाशी अधिकाऱ्यांना त्यांनी आपला नेहमीचा संदेश पुन्हा दिला. देशाचे सैनिक हे आपले कुटुंब असल्याचे त्यांनी अधोरेखित केले. ‘आपल्या या कुटुंबाबरोबर दिवाळी साजरी करण्याची आता मला सवय लागली आहे. त्यामुळेच मी माझ्या कुटुंबाबरोबर दिवाळी साजरी करण्यासाठी येत असतो,’ असेही मोदी या वेळी म्हणाले.
आयएनएस विक्रांत या समुद्रातील महाकाय युद्धनौकेचे वर्णन करताना ते म्हणाले, की आज एकीकडे अनंत क्षितीज आणि अनंत आकाश आहे, तर दुसरीकडे महाकाय आयएनएस विक्रांत आहे, जी या अनंत शक्तींना मूर्तरूप देते आहे.
२००१ मध्ये ज्या वेळी ते पहिल्यांदा गुजरातचे मुख्यमंत्री झाले तेव्हा त्यांनी गुजरातमधील कच्छमध्ये दिवाळी साजरी करण्याचा निर्णय घेतला होता. त्या वेळी कच्छ हा प्रदेश विनाशकारी भूकंपातून सावरत होता. त्या वेळी दिवाळी साजरी करण्यासाठी मोदी यांनी समाजातील ज्या घटकाला सर्वांत जास्त मदतीची गरज आहे अशा घटकाला निवडले होते. २००९ मध्ये गुजरातचे तिसऱ्यांदा मुख्यमंत्री असताना त्यांनी भारत-चीन सीमेवरील ‘नथू ला’ हे ठिकाण दिवाळी साजरी करण्यासाठी निवडले होते.
दहा वर्षांत मोदी यांनी दिवाळी साजरी केलेली ठिकाणे…
२०१४ – सियाचिन हिमनदी
२०१५ – पंजाब सीमा
२०१६ हिमाचल प्रदेशातील चीन सीमा
२०१७ उत्तर काश्मीरमधील गुरेझ सेक्टर
२०१८ – उत्तराखंडमधील हर्शिल
२०१९ – जम्मू-काश्मीरमधील राजौरी
२०२० – राजस्थानमधील लोंगेवाला
२०२१ – जम्मू-काश्मीरमधील नौशेरा
२०२२- लडाखमधील कारगिल
२०२३ – हिमाचल प्रदेशातील लेपचा
२०२४ – गुजरातमधील सर क्रिक
