बिग बॉस फेम शिव ठाकरे संदर्भात एक धक्कादायक वृत्त समोर आले आले. शिवच्या मुंबईतील गोरेगाव याठिकाणी असणाऱ्या निवासस्थानी आगीची घटना घडली आहे. कोलते पाटील व्हर्व्ह या इमारतीमध्ये असणाऱ्या अभिनेत्याच्या घरातून याठिकाणचा व्हिडिओही समोर आला आहे. मीडिया रिपोर्टनुसार असे समोर आले आहे की, या दुर्घटनेमध्ये अभिनेत्यासह त्याचे कुटुंबीय सुरक्षित आहेत. आगीच्या घटनेत कोणालाही दुखापत झालेली नाही. अग्निशमन दलातील अधिकारी त्यांचे कर्तव्य बजावत असतानाचा व्हिडिओ सोशल मीडियावर व्हायरल झाला आहे.
विरल भयानीने इन्स्टाग्रामवर आगीच्या घटनेनंतर घरामधील काही दृश्ये शेअर केली असून, त्यात असे दिसून आले की मोठी आग लागली होती. परिणामी मालमत्तेचे गंभीर नुकसान झाले आणि घरातील काही सामानाची राख झाली आहे. व्हिडिओमध्ये अग्निशमन दलाची टीम आवश्यक उपाययोजना करताना दिसली. आगीचे कारण शोधण्याचा प्रयत्नही केला जात आहे.
सोशल मीडियाद्वारे हा व्हिडिओ समोर आल्यानंतर चाहते शिवविषयी काळजी व्यक्त करत आहेत. शिव आणि त्याचे कुटुंबीयांच्या सुरक्षिततेविषयी चिंता व्यक्त करणाऱ्या असंख्य कमेंट या व्हिडिओवर आल्या आहेत. आगीची भीषणता पाहता ही चिंता व्यक्त केली जाते आहे. अद्याप याप्रकरणी शिवने त्याच्या सोशल मीडियाद्वारे कोणतीही प्रतिक्रिया दिलेली नाही.
मुळच्या अमरावतीच्या असणाऱ्या शिव ठाकरेने मुंबईत घर घेण्याचे स्वप्न अलिकडेच पूर्ण केले होते. त्याने मुंबईत घर घेतल्याची घोषणा ‘झलक दिखला जा’ हा शो करत असताना केली होती. त्यावेळी या शोची परीक्षक असणाऱ्या फराह खानने शिवला गणपती बाप्पांची मूर्तीही भेटवस्तू म्हणून दिलेली. या स्वप्नपूर्तीनंतर चाहत्यांनी शिवचे विशेष कौतुकही केलेले.
दरम्यान शिव ठाकरे ‘एमटीव्ही रोडीज रायजिंग’, ‘बिग बॉस मराठी 2’, ‘बिग बॉस 16’, ‘झलक दिखला जा 11’, ‘खतरों के खिलाडी 13’ या रिअॅलिटी शोसाठी ओळखला जातो. मराठीसह हिंदी टेलिव्हिजन विश्वात त्याने एक वेगळी ओळख निर्माण केली आहे. अलिकडच्या काळात तो काही अल्बममध्येही झळकला. एकंदरितच सोशल मीडियावर शिवची विशेष चर्चा असते.
