महाराष्ट्र नवनिर्माण सेनेचे अध्यक्ष राज ठाकरे आणि शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांनी एकमेकांना टाळी देण्याची चर्चा सुरू झाल्यानंतर दोन्ही पक्षांच्या समर्थकांनी एक पाऊल पुढे टाकत एकत्र येण्यासाठी साकडे घातले आहे. ‘उद्धवसाहेब, तुम्ही स्वत: राज ठाकरे साहेबांना ‘मातोश्री’चे आमंत्रण द्या व महाराष्ट्राला आनंदाची बातमी द्या,’ अशा आवाहनाचे फलक शिवसेनेच्या पदाधिकाऱ्यांनी लावले आहेत. राज ठाकरे यांच्या आवाहनाला उद्धव ठाकरे यांनीही सकारात्मक प्रतिसाद दिला आहे. त्यामुळे ठाकरे बंधू एकत्र येणार असल्याच्या चर्चांना उधाण आले आहे.
विशेषत: शिवसैनिक व मनसैनिकांमध्ये मोठा उत्साह संचारला आहे. त्यामुळे ठाकरे गटाचे उपशहरप्रमुख बाळा दराडे व माजी नगरसेविका किरण गामणे (दराडे) यांनी शालिमार येथील शिवसेना कार्यालयासह विविध ठिकाणी फलक उभारत उद्धव ठाकरे यांना केलेली विनंती चर्चेचा विषय ठरली आहे.
‘मा. पक्षप्रमुख उद्धवसाहेब, आम्हाला आमिष दिले गेले, मोठ्या-मोठ्या ऑफर आल्या, दबाव टाकला. पण साहेब, आम्ही डगमगलो नाही. घाबरलो नाही. तुमच्या नेतृत्वाबरोबर आदित्य साहेबांशी एकनिष्ठ राहिलो. आता आमची मागणी आहे की, तुम्ही स्वत: राज ठाकरे साहेबांना मातोश्रीचे आमंत्रण द्या व महाराष्ट्राला आनंदाची बातमी द्या.’
राज्यात सध्या मनसे अध्यक्ष राज ठाकरे आणि शिवसेना (उद्धव बाळासाहेब ठाकरे) पक्षाचे पक्षप्रमुख उद्धव ठाकरे यांच्या मनोमीलनाच्या चर्चेला उधाण आले असतानाच मनसेच्या प्रतिसभागृहासाठी शिवसेना (उबाठा) पक्षाचे माजी मंत्री आदित्य ठाकरे यांना आमंत्रित केले आहे. आदित्य ठाकरे यांच्यासोबत राज्यातील इतर सर्व प्रमुख पक्षांच्या प्रमुख नेत्यांना या प्रतिसभागृहासाठी आमंत्रित करण्यात आले आहे.
Leave a Reply