तीन वर्षांपूर्वी गोळीबारात मारला गेलेला कुख्यात गँगस्टर अतीक अहमदच्या मुलाचा रस्ते अपघातात मृत्यू झाला आहे. अतीकचा मुलगा अबान अहमद चा झाशीच्या पुंछ पोलीस ठाण्याच्या हद्दीत अपघात झाला. या अपघातात त्याच्या सोबत आणखी दोघांचा शेवट झाला. दुर्घटनेत तीन जण जखमी झाले असून त्यांची अवस्था गंभीर आहे. अबान अहमद प्रयागराजहून झाशीला जात होता. तुरुंगात असलेल्या भावाच्या भेटीसाठी जात असताना अबानचा अपघाती मृत्यू झाला.
अबान प्रवास करत असलेली कार महामार्गावरील दुभाजकाला धडकली. अपघात झाला तेव्हा कार भरधाव वेगात होती. धडक इतकी जोरदार होती की कारच्या पुढील भागाचा अक्षरश: चक्काचूर झाला. भरधाव कारवरील नियंत्रण सुटून ती दुभाजकावर आदळल्यानं अपघात झाल्याची माहिती झाशीच्या एसएसपींनी दिली. या अपघातात अबानचा मित्र सोनूचाही शेवट झाला.
अपघाताची माहिती मिळताच पोलीस घटनास्थळी पोहोचले. जखमींना तातडीनं रुग्णालयात दाखल करण्यात आलं. मृतांपैकी अहबान अहमदची ओळख पटली आहे. या अपघातात मोहम्मद जैद, उमरसह तीन जण जखमी झाले आहेत. त्यांच्यावर रुग्णालयात उपचार सुरू आहेत. पोलिसांनी अपघाताचा तपास सुरू केला आहे. अपघात नेमका कोणत्या परिस्थितीत झाला, त्यावेळी कारचा वेग किती होता, याचा तपास सुरू आहे. पोलीस अपघातस्थळी पोहोचले असून पुरावे गोळा करण्याचं काम सुरू आहे.
अबान अहमदसह तिघांचा अपघातात शेवट झाला. हे तिघे क्रेटा कारनं प्रवास करत होते. या कारवर ओव्हर स्पीडिंगचे अनेक चलान आहेत. सोबतच पार्किंगचे नियम मोडण्याचे आणि ड्रायव्हिंग लायसन्सशिवाय वाहन चालवण्याचेही चलान आहेत. अपघातग्रस्त क्रेटा कार मोहम्मद जैदच्या नावावर नोंद आहे. कारच्या मागे आर्मीचा उल्लेख आहे.
अबान अहमदचा मोठा भाऊ अली अहमद झाशीच्या तुरुंगात आहे. त्यालाच भेटण्यासाठी अबान अहमद झाशीला जात होता. अपघाताची माहिती मिळताच पोलीस पोहोचले. त्यांनी शव ताब्यात घेऊन पंचनामा केला. ताब्यात घेण्यात आलेले शव उत्तरीय चाचणीसाठी पाठवण्यात आले आहेत.
