“राज्यातील महिला, विविध जाती-जमातींचे नागरिक यांनी महायुतीला विजयी केले. नागरिकांच्या विश्वासाचा हा विजय आहे. हा विजय कधीही आमच्या डोक्यात जाणार नाही. ही सत्ता आम्हाला कायम जमिनीवर ठेवेल,” असे प्रतिपादन मुख्यमंत्री देवेंद्र फडणवीस यांनी केले. मुख्यमंत्रीपदाची शपथ घेतल्यानंतर फडणवीस रविवारी पहिल्यांदाच नागपुरात आले. त्यांच्या स्वागतासाठी काढण्यात आलेल्या रॅलीच्या समारोपप्रसंगी त्यांनी नागरिकांशी संवाद साधला. त्यावेळी, त्यांनी महाराष्ट्र बदलण्यासाठी हे सरकार काम करणार असल्याचे आश्वासन दिले.
जागोजागी होणार फुलांचा वर्षाव, ढोल-ताशांचा गजर आणि नागरिक आणि कार्यकर्त्यांची गर्दी अशा वातावरणात राज्याचे नवे मुख्यमंत्री देवेंद्र फडणवीस यांचे नागपुरात प्रचंड जल्लोषात स्वागत करण्यात आले. भारतीय जनता पक्षाच्यावतीने नागपूर विमानतळ ते लक्ष्मीभुवन चौक या मार्गावर ही रॅली काढण्यात आली.
फडणवीस यांच्या स्वागतासाठी डॉ. बाबासाहेब आंबेडकर आंतरराष्ट्रीय नागपूर विमानतळावर मोठ्या संख्येने कार्यकर्ते एकत्र आले होते. फडणवीस यांनी विमानतळाबाहेरील डॉ. आंबेडकरांच्या पुतळ्याला अभिवादन केल्यानंतर रॅलीला प्रारंभ झाला. रॅलीच्या मार्गावर ठिकठिकाणी फडणवीसांचे विविध प्रकारे स्वागत करण्यात आले. अनेक ठिकाणी भाजपा महिला-पुरुष कार्यकर्त्यांनी प्रचंड फुले उधळली. याशिवाय, ठिकठिकाणी हार घालूनही त्यांचे स्वागत करण्यात आले. रॅडिसन ब्ल्यू चौकात केंद्रीय मंत्री नितीन गडकरी यांनीदेखील फडणवीस यांचे स्वागत केले.
यावेळी, फडणवीस यांच्यासह अमृता फडणवीस, मंत्री चंद्रशेखर बावनकुळे, आशिष जयस्वाल, आमदार परिणय फुके, कृष्णा खोपडे, सुधाकर कोहळे, आशिष देशमुख, भाजपचे माजी जिल्हाध्यक्ष डॉ. राजीव पोतदार, शहराध्यक्ष बंटी कुकडे रॅलीतील रथावर उपस्थित होते.
विमानतळ, डॉ. हेडगेवार चौक, राजीवनगर, जयप्रकाशनगर, छत्रपती चौक, स्वातंत्र्यवीर सावरकर चौक, आठ रस्ता चौक, लक्ष्मीनगर चौक, बजाजनगर चौक, शंकरनगर चौक या मार्गाने जाऊन लक्ष्मीभुवन चौकात रॅलीचा समारोप झाला. शहरातील सहाही विधानसभा मतदारसंघातील भाजपच्या कार्यकर्त्यांनी निरनिराळ्या चौकांमध्ये स्वागत कार्यक्रमांचे आयोजन केले होते. रिपब्लिकन पक्षाचे जयदीप कवाडे आणि त्यांच्या कार्यकर्त्यांनीही रॅलीचे स्वागत केले.
रॅलीच्या मार्गावर विविध ठिकाणी डीजे, बॅँड, ढोल-ताशे यांनी परिसर दणाणून सोडला. याशिवाय, कार्यकर्त्यांच्या आणि नागरिकांच्या ‘जय भवानी, जय शिवाजी’, ‘जय श्रीराम’ अशा घोषणांनीही रॅलीच्या उत्साहात भर घातली होती. याशिवाय, भजनी मंडळे, विविध वेशभूषेतील नागरिक आणि लहान मुलेही या स्वागतात सहभागी झाली होती. फडणवीस यांनी ठिकठिकाणी होत असलेल्या या स्वागताचा नागरिकांना अभिवादन करून स्वीकार केला. रॅलीच्या संपूर्ण मार्गावर भाजपचे तसेच भगवे झेंडे आणि फडणवीस यांच्या स्वागताचे फलक लावण्यात आले होते.
लक्ष्मीभुवन चौक येथे झालेल्या सभेत फडणवीस यांनी उपस्थितांना संबोधित केले. “पंतप्रधान नरेंद्र मोदी यांच्या नेतृत्वात आणि कार्यकर्त्यांच्या बळावर महायुतीला विधानसभा निवडणुकीत मोठा विजय मिळाला आहे. ही सत्ता सेवा करण्याकरता आणि महाराष्ट्र बदलण्याकरता मिळाली आहे. सामान्य माणसाच्या जीवनात परिवर्तन करण्याकरता सत्ता मिळाली आहे. महाराष्ट्राची स्वप्ने पूर्ण करण्याकरिता माझ्यासह उपमुख्यमंत्री एकनाथ शिंदे, अजित पवार आणि संपूण चमू एकदिलाने काम करेल. हे सरकार २४ बाय ७ नागरिकांकरता काम करेल, असे फडणवीस म्हणाले.
