अखेर अंडरवर्ल्ड डॉन दाऊद इब्राहिमच्या रत्नागिरीतील वडिलोपार्जित जमिनीला खरेदीदार मिळाला आहे. 5 मार्च 2026 रोजी केंद्र सरकारने पुकारलेल्या लिलावात दोन धाडसी बोलीदारांनी या जमिनी आपल्या नावे केल्या आहेत. रत्नागिरी जिल्ह्यातील खेड तालुक्यातील मुंबके गावात दाऊदच्या मालकीच्या चार शेतजमिनी होत्या. सरकारी कागदपत्रांनुसार, या सर्व जमिनी दाऊदची आई अमीना बी यांच्या नावावर नोंदवल्या होत्या. स्मगलर्स अँड फॉरेन एक्स्चेंज मॅनिपुलेटर्स ॲक्ट (SAFEMA) अंतर्गत या जमिनी अनेक वर्षांपासून जप्त करण्यात आल्या होत्या. गुन्हेगारी कृत्यांतून कमावलेली मालमत्ता जप्त करून ती समाजाच्या मुख्यधारेत आणण्याचा सरकारचा मुख्य उद्देश या लिलावामुळे यशस्वी झाला आहे.
मुंबके गावातील या जमिनींची सरकारी किंमत काही हजारांपासून 9 लाखांपर्यंत होती. सर्वात मोठा प्लॉटची (10,420.51 चौरस मीटर) मूळ किंमत 9,41,280 रुपये होती, तो 10 लाख रुपयांत विक्री झाल्याची माहिती मिळते. तर दुसरा प्लॉटची (8,953.55 चौरस मीटर) मूळ किंमत 8,08,770 रुपये आहे. त्याचबरोबर इतर दोन प्लॉट 2,33,430 रुपये आणि सर्वात छोटा प्लॉट तर अवघ्या 15,440 रुपयांचा विकला गेला. सरकारने लिलाव यशस्वी करण्यासाठी सफेमा नियमांनुसार, 15 ते 30 टक्के सूट दिली होती, त्यामुळे ही डील गुंतवणूकदारांसाठी फायदेशीर ठरली. यशस्वी बोलीदारांना एप्रिल 2026 पर्यंत पूर्ण रक्कम जमा करावी लागणार आहे.
सन 2017 पासून दाऊदच्या या मालमत्ता विकण्याचे प्रयत्न सुरू होते. 2017, 2020, 2024 आणि 2025 अशा चारही वेळा लिलावाला कोणीही फिरकले नव्हते. नोव्हेंबर 2025 मध्ये सरकारने मूळ किमतीत 30 टक्के कपात करूनही डॉनच्या दहशतीमुळे कोणी समोर येत नव्हते. मात्र, यावेळेस मुंबईतील एका व्यक्तीने एक प्लॉट खरेदी केला आहे. तर दुसऱ्या बोलीदाराने उर्वरित तीन प्लॉट खरेदी केले आहेत. सुरक्षेच्या कारणास्तव या खरेदीदारांची नावे सध्या गोपनिय ठेवण्यात आली आहेत.
